محموت شاہی کا سید میر انور شاہ ؒ کیساتھ مقابلہ!! تیراہ اورکزئی ایجنسی کے علاقے "مَنی خیل" میں ایک سید تھا جو "محموت شاہی" کے نام سے مشہور تھا، اُس کا بہت بڑا قبیلہ تھا اپنے قبیلے میں عزت اور قدر کی نگاہوں سے دیکھا جاتا تھا. سید میر انور شاہ ؒ کی شُہرت اور اُن کے مُریدوں اور عقیدت مندوں کی زیادتی سے محموت شاہی کے دل میں بُغض و عناد پیدا ہوگیا.
محموت شاہی ایک دن اپنے متعلقین کے ساتھ سید میر انور شاہ ؒ کی خدمت میں آگیا اور کہنے لگا کہ آپ ؒ میرے ساتھ معجزہ دکھانے کا مقابلہ کریں، سید میر انور شاہ ؒ نے فرمایا معجزے الله تعالیٰ کے حکم سے ضرورت کے وقت ہوتے ہیں لیکن محموت شاہی اپنی بات پر ڈٹا رہا اور کہا کہ آج میں معجزے کیساتھ زمین سے پانی نکالوں گا اگر آپ ؒ بھی پانی کا چشمہ جاری کرسکتے ہیں تو ٹھیک ہے ورنہ بہتر یہ ہے کہ آرام سے بیٹھ جائیں اور لوگوں کو گمراہ نہ کریں.
محموت شاہی بہت سارے لوگوں کیساتھ روانہ ہوگیا، ایک جگہ ٹھہر گیا اور نیزہ زمین پر دے مارا تو پانی وہاں سے اُبل پڑا لیکن کچھ دیر بعد پانی بند ہوگیا وہاں موجود لوگوں سے کہا کہ کس طرح میں نے پانی کو بند کیا دیکھو انور شاہ ؒ مقابلے کیلئے نہیں آیا اگر وہ آتا تو پانی جاری رہتا. وہ لوگ جناب میر انور شاہ ؒ کی خدمت میں آگئے اور عرض کیا کہ آپ ؒ بھی معجزہ دیکھائیں اور زمین سے پانی نکالیں، حضرت میر انور شاہ ؒ نے فرمایا اے نادانو! یہ کوئی معجزہ نہیں تھا اور پانی زمین سے جاری نہیں ہوا بلکہ محموت شاہی نے زمین میں پانی سے بھرا ہوا ایک بہت بڑا مشکیزہ دفنایا تھا اُسی مشکیزے میں نیزہ مارا اور اُس میں سوراخ ہوگیا اور پانی جاری ہوا، آپ لوگ جائیں اُسی جگہ کو کھودیں حقیقتِ حال آپ سب کو معلوم ہوجائے گی چناچہ اُن لوگوں میں سے پانچ چُنے ہوئے افراد گئے اور اُسی جگہ کو کھودا تو مشکیزہ نکل آیا. مشکیزے کو اِس بڑے مجمعے میں لے آئے، جب لوگوں نے محموت شاہی کے نیزے سے پھٹے ہوئے مشکیزے کو دیکھا تو غصے میں آگئے اور محموت شاہی پر نفرین شروع کی جھوٹی کرامت کی جگہ پر لوگوں نے پتھر کا تخت بنایا جو ابھی تک یادگار کے طورپر موجود ہے.
اِس واقعے سے مَنی خیل اور بَرمحمد خیل اقوام کا بچہ بچہ واقف ہے اور اِس واقعے کو اِس طرح بیان کرتے ہیں جیسے کہ کل ہوا ہو، تو پھر آپ بھی ذرا محبّت سے کہو نا "حق بادشاہ میر انور سید دے"
Post a Comment