میر شاہ کا جناب سید میر انور شاہ ؒ کیساتھ مناظرہ- ایک واقعہ ہمیں نسل در نسل اِس طرح پہنچا ہے کہ ایک دن حضرت سید میر انور شاہ اعلیٰ الله مقامہ کُرم ایجنسی کے "گوساڑ" گاؤں میں چِنار کے درخت کے نیچے آرام کیلئے بیٹھ گئے معتقدین بھی ہمراہ تھے. اُس درخت کے نزدیک کھیتوں میں شور و غوغا شروع ہوا، سید بزرگوار ؒ نے ایک آدمی کو بھیجا تاکہ وہاں دیکھ سکے کہ کیا ہوا ہے اور کیوں رونے کی آوازیں آرہی ہیں؟
وہ آدمی ایک لڑکے کو لے آیا جب سید بزرگوار نے رونے کی وجہ پوچھی تو اُس نے جواب دیا کہ میں اسکول کا ایک طالب علم ہوں مجھے سبق یاد نہیں ہوتا اور استاد ہمیشہ مجھے مارتا ہے، پٹائی کے ڈر سے میں یہاں کھیت میں چھپا ہوا تھا آپ کے آنے سے مجھے لگا کہ استاد نے مجھے پکڑنے اور مارنے کیلئے لڑکے بھیجے ہیں. سید موصوف کو لڑکے کی حالت پر ترس آیا اُس کے سر پر شفقت اور مرحمت کا ہاتھ پھیرا، اپنا لعابِ دھن اُس کے منہ میں دیا، دعا دی اور اسکول کی طرف تسلی کیساتھ رخصت کیا. لڑکے کی قسمت بدل گئی اساتذہ جو درس دیتے اُسی وقت اُسے یاد ہوتا تھا اور اُس پر مزید انکشافات بھی ہوگئے، قوتِ حافظہ حد سے زیادہ تیز ہوگئی ایک سال کا نصاب بہت کم عرصے میں ختم کیا اور حرف بہ حرف یاد بھی تھا. اساتذہ اُس کے ذہن کی تیزی پر حیران تھے، بہت کم عمر میں علم و دانش کے اونچے مرتبے پر فائز ہوگئے. پرندوں کی بولی بھی سمجھتے تھے، اِس طرح وہ لوگوں کے توجہ کا مرکز بن گئے- یہ عالم سید میر شاہ تھے جو مشہور و معروف سید لالا گل بابا کے پوتے تھے. کُرم ایجنسی کے "رمکی" گاؤں میں رہائش پذیر تھے بہت سے جائیداد کے مالک تھے.
سید میر انور شاہ ؒ نے جب کرُم ایجنسی آنا جانا شروع کیا تو معتقدین کی تعداد روز بروز بڑھ رہی تھی، بہت سال گزر گئے اُس زمانے میں سادات کے بڑے بڑے گھرانے کُرم ایجنسی میں موجود تھے- بعض گھرانوں کا جناب سید میر انور شاہ ؒ کیساتھ حسد پیدا ہوگیا، مخالفین نے سید میر انور شاہ ؒ اور اُن کے مُریدوں کی مخالفت پر کمر باندھ لی- پہلے یہ فیصلہ کیا کہ سید میر انور شاہ ؒ کیساتھ عِلمی بحث کیجائے، اُس کیلئے میر شاہ کو نامزد کیا گیا جو کہ جوان ہی تھے. بحث و مباحثے کیلئے سید فخرِ عالم بابا ؒ کی زیارت کا انتخاب کیا گیا، ایک طرف بہت بڑا اجتماع تھا جس میں چُنے ہوئے دانشور تھے اور دوسری طرف ایک درویش کیساتھ چند پھٹے پرانے کپڑوں میں عاجز فقیر مُرید تھے. بڑے گروہ والے اِس امید کیساتھ آئے تھے کہ وہ کامیابی سے ہمکنار ہو جائیں گے اور دوسرے گروہ کو شکست و خجالت کا سامنا کرنا پڑجائے گا اور ہمیشہ ہمیشہ کیلئے کرُم ایجنسی سے بند ہو جائیں گے. میر شاہ کیساتھ اور اہلِ علم بھی مدد کیلئے موجود تھے، میر شاہ اپنی کتابیں خچر پر لائے تھے. جناب سید میر انور شاہ ؒ کیساتھ ایک کتاب بھی نہیں تھی.
میرشاہ کا سید میرانور شاہ کیساتھ مناظرہ
سید میر انور شاہ ؒ اور میر شاہ جب آمنے سامنے بیٹھ گئے تو میر شاہ نے پانی سے بھرا ایک جام سید میر انور شاہ ؒ کے سامنے پیش کیا، جناب سید میر انور شاہ ؒ نے گلاب کا ایک پھول اُس جام میں رکھ دیا. میر شاہ کا پانی سے بھرا جام پیش کرنا اِس بات کی طرف اشارہ تھا کہ کُرم ایجنسی سادات سے اور بزرگوں سے اِس طرح بھری ہے جس طرح یہ جام پانی سے بھرا ہوا ہے اور آپکی جگہ اِس میں نہیں ہے. جواب میں سید میر انور شاہ ؒ نے گلاب کا پھول رکھ کر بتا دیا کہ "میں سارے سادات کا پھول ہوں یعنی سردار ہوں". میر شاہ نے دقیق اور مشکل مسائل و سوالات کی فہرست سنائی، اُسکا اندازِ بیان سخت کرخت اور متکبرانہ تھا- جناب سید میر انور شاہ ؒ نے میر شاہ کے اِس کرخت لہجے کے جواب میں فرمایا کہ
اے میر شاہ ذرا اُس وقت کو یاد کرو جب آپ نالائق تھے سبق یاد نہیں کرسکتے تھے اساتذہ آپ کو مارتے تھے ایک دن چِنار کے درخت کے نزدیک کھیت میں چُھپ گئے تھے کسی کے آنے اور چِنار کے درخت کے نیچے بیٹھنے سے آپ نے چیخنا شروع کیا تھا پھر ایک آدمی آپکو لے آیا اور آپ نے اپنی کمزوری اور کُند ذہنی کا اظہار کیا اُس نے آپکو دعا دی اور اُسی دن سے خدا نے آپ کے ذہن کو تیز کیا ہر چیز آپکو یاد ہوتی تھی سید میر انور شاہ ؒ کے اِس کلام کو سننے سے میر شاہ کا متکبرانہ انداز عاجزی اور انکساری میں تبدیل ہوگیا اور عِلمی سمجھ اور قابلیت خاک میں مل گئی
یہاں مولائے متقیان جناب علی ابنِ ابی طالب علیہ السلام کا وہ قول جس پر دنیا کے تمام دانشوروں کی کتابیں قربان ہوں، آپکے پیشِ خدمت ہے:-
علم تین بالشت ہے جو پہلی بالشت تک پہنچا متکبر ہوگیا اور دعویٰ کرنے لگا اور جو دوسری بالشت تک پہنچا متواضع ہوگیا اور اپنے آپ کو ذلیل سمجھنے لگا اور جو تیسری بالشت تک پہنچا فقر اختیار کیا اور فنا ہوگیا اور اُس کو اِس بات کا علم ہوا کہ وہ کچھ نہیں جانتا
میر شاہ عاجزی اور نافہمی کے مقام پر بیٹھے جمالِ انوری کو حیرت کی نظروں سے دیکھ رہے تھے بچپن کی یادیں تازہ ہو گئی تھیں، برسوں پہلے دیکھی نشانیوں کو پہچان گئے بدن کانپنے لگا اور کہہ رہے تھے "جس کو سید کی طلب ہو وہ یہی ہیں، جس کو تلاشِ رہبر ہو وہ یہی ہیں، اگر کسی کا مقصد دلبر تک پہنچنا ہو تو وہ یہی ہیں" یہ سید بھی ہیں، رہبر بھی اور دلبر بھی- جناب میر انور شاہ ؒ نے آہستہ سے فرمایا:-
کتابونه به د ٹول په وینو رنگ شی که درته کڑم په جبین باندے خالُونه
اے میر شاہ جس مقام اور در پر آپ پہنچے ہیں اُس دروازے کے تالے کی کنجیاں میرے پاس ہیں
Post a Comment